⬅️⬅️⬅️⬅️ زجججججل ➡️➡️➡️➡️
~~~~~~~ غابة بلادي ~~~~~~~
ياك سلبتي عقلي بهواك
و غدرتي لگليب معاك
خليتي دمعي هطال
تمنيت صدرك حنين
يدفيني هاذي سنين
وي كون لي شجرة بظلال
ساعا ظني فيكي خاب
و صبحتي بغدرك حطاب
من فاسو عايش ف اهوال
من صغري قتلتي لحلام
حولتي نورها ل ظلام
و سديتي بابها ب اقفال
فيك حليت عيني ب صياح
عشمتي صباحي ب افراح
ما ظنيت حالي فوحال
كل مرة نگول تحني
من شجرك انا نجني
ما يشبع جوعي ب اغلال
سعا انت جريتي ضدي
و حفرتي قبر ل سعدي
و لبستيه عنوة دربال
سلطتي ذياب الغابة
و مخالبهم كي شطابة
فيا تفرس و لا ع البال
تاكل خيري و خميري
و تخلي عظمي قبري
عايش فيه وجعي معضال
يا بلادي ذيابك جلاد
جارو طاغو ع لعباد
و حالو جورهم حلال
يا بلادي واش ولدتي
غير مساخط رضعتي
و تگولي سعدي ب رجال
ساسو لوراق و عراو
حرگو لغصان و خلاو
جنانك باكي للحال
سرقو منك الضحكة
و لاحوها ف بحر شكا
و زادوها عليك ب لهبال
جمعو خيرك ف التليس
و باعوه ف السوق بخيس
و كالو حق الدلال
يا بلادي انا نبغيك
وخا صفعوني يديك
و حلمي تبخر خيال
هذا حرفي فيك يصيح
يتمنى شمسك تزيح
ظلام الليل علينا طال
يعود ربيعك بعد خريف
يخضر ما مات ف صيف
و طيورك تغني موال
انفكو اغلال الحگرة
و ما نشوفو باقي قهرة
و نشربو عزنا ك زلال
هذا حلمي فيك كبير
يكون غطانا فيك حرير
يا بلادي تفخري ب رجال
گالو ل اقوال ب لفعال
ماشي ب الجاه و ل اموال
اعمار الرجال تقاس ب لعمال
حسن العلوي
مراااااااكش ( أكتوبر 2018 )
ليست هناك تعليقات:
إرسال تعليق