( قصة من نسج الخيال و إن تصادفت مع بعض الاشخاص فهي من باب الصدفة ليس اكثر )
★حمان و وردة★
مثل سمعتو من مدة
يتنحتاح عن الشدة
جّديد لو جدة
و البالي لا تفرط فيه
زوجة سميتها وردة
لو كانت غير زينة بعدا
لا طعم فيها لا لذة
و اللي قرب لها تشويه
نزلت على حمان ك القضا
نزلة ما تبغيها لعدا
تحنحن كيف العودة
حتى اللي يهدّن تجليه
الزوج هد عليها هدة
هزت من صباطها فردة
شيرات عليه بشدة
صدقت مزرقة لو عينيه
قلت نتدخل و لابدَّ
نسكَّت هاذ الرعدة
ما كانت مستعدة
قالت خليني نوريه
شديتها و كانت مجهدة
باينة في طباعها جلدة
تنقز كيف القردة
و باغية تكمل عليه
السيد مريض بالمعدة
حالتو تشفي العدا
وهي طول و قلدة
يموت يلا طاحت عليه
قلت ليها كلمة وحده
غادي نتّاصل بالعمدة
خافت و عطات بالصدة
و هو بقى طايح لهيه
طرداتو شر طردة
فكل خصام ياكل غردة
دخلتو نعس حتى لا غدا
حيث هي موالفة تجليه
كان يبات في جَّردة
من الخوف و من الرعدة
هو هزيل و هي كسدة
مسكين كتغلب عليه
ديما يطلب النجدة
عايش في هم و غدة
آش الداه لهاذ الوعدة
سعدو و راه حاصل فيه
الزواج من غير مودة
يقطعو قطيع الشهدة
يتحل و تتفك العقدة
و كلها يرحل لجيه
و تجريبة جديدة يبدا
حياة لانسان غي وحدة
علاش يعيشها ف النكدة
كلها يختار من يواتيه
يزيد علوي اسماعيلي
ليست هناك تعليقات:
إرسال تعليق