انا والسؤال
واش نكمل
واش نرجع
عييت نسول
والسؤال حامي يوجع
سولت عيوني
آش شافت
لقيتها باكية كتدمع
سولت وداني
آش سمعت
گالتلي خبار كتخلع
سؤال هايج ما هناني
واخة درت اللي درت
حتى بجواب
ما بغى يقنع
واش نوصل
لداك ...البر
واش نحتل
فجوف هاد لبحر
لمواج عطشانة
والتيه... سراب
شحال كيخدع
من موجة لموجة
نركب هبالي
لفهامة مقجوجة
وهي اللي عندي
هي اللي فبالي
گلت نجرب نسايس
يمكن لا...
يمكن ينفع
وامشيت مع التيار
مرة طيحة مرة نوضة
مرة زعامة ومرة اشوار
واخة قالولي الطريق
مسدودة
درت راسي ما كنسمع
نفكر ف الخطوات.. اللي فاتو
اما الجايات..حالهم حال
يمكن شكي يفهم ذاتو
يكبر يولي سؤال
ويشوف لحالي
عييت ما نرقع
هذا سؤال
ما بغى يسكت
واش
نموت ليه ف جواب
نوكلو من تحت لتحت
مرة راحة.. مرة عذاب
ولا بغى يشبع
لشهب سعيد
شتنبر 2018
ليست هناك تعليقات:
إرسال تعليق