. ★الحصاد و الفساد★
حْرَثت الارض** رشِّيت سْماد
جات الغلة ** و الخير تزاد
حمدت الله * تحقق مرادي
دَرت تويزة ** نحصدو البلاد
نجمعوا الغلة ** بشكل مْگاد
و أهل الدوار* هُم عمادي
فَرَّشْت هْيَادَر ** فوق السجاد
و نصَبْت الغَلاَّي ** ف نار من العواد
منظر زوين * ف جنب الوادي
وَجَّدْت اللازم ** عُدة و عتاد
وخير كثير ** بأشكال اعداد
زيت وزيتون * عسل و زبادي
حطِّيت صواني ** و جَبْت البراد
و دوَّرت عليه ** كيسان جداد
و قلت مرحبا * باهلي و سيادي
اللمة تحلى ** و يزهى القعاد
مع الاحباب ** و ناس جْواد
ما نشرب شاي * وانا فرادي
تَّجمع الجمع ** رام المراد
اللمة كبرت ** بلغوا البعاد
الكبار خوت * الصغار ولادي
كلاو و شبعوا ** و بدا لَنْشاد
الصوت يصِيت ** و الصّدى يتعاد
في جوف الليل * و الجمر الگادي
الصوت دْرَج ** غطَّى البلاد
وصل الصوت ** لقاضي جلّاد
ما حمل لمة * و للجمع يعادي
بْعَث مقدّم ** راكب الجواد
معاه حمِية ** من رجال شداد
وصل و الشر * في عينو بادي
شتّت العواد ** طيَّر لَرْماد
لاح السجاد ** هرّق البراد
ما ترك لا رايح * و لا غادي
حاولت نوقف ** لو بالمرصاد
نحكي لُو ذا ** موسم الحصاد
و هاذ الجمع * هُم سنادي
تْوَخَّر و حَطّ ** صبعو عَلْ زناد
و اتهمنا ** بمجمع الفساد
و قال الجمع * ماشي عادي
حرق الخيمة ** قلَّع لوتاد
و كتف يدي ** بحديد اصفاد
عييت نفسّر * عييت النادي
الدنيا ولات ** في عيني سواد
ما لقِيت ثقة ** ما لقِيت رشاد
بعد التقهرت * ف ارض اجدادي
كنت من صغري ** عايش ف حياد
ما نحمل غل ** و لا تنكاد
راضي بقليل * مهني ف وسادي
فالشتا فلاح ** و الصيف صياد
نرعى الغنم ** نربي الجياد
ما نعرف مقاهي * و لا نوادي
لكن اليوم ** خاب المراد
و ارض الخير ** غزاها لجراد
و خنجر الغدر * ضرب الفَّادي
هاذ الضربة ** اسبابها حساد
مْ ذاك المسؤول ** راعي الفساد
اللي مع الفقير * ديما معادي
دعيتو لله ** الكريم الجوّاد
غدّا يتحاكم ** يوم الميعاد
لطغيانو عليا * و تشريد اولادي
يزيد علوي اسماعيلي
ليست هناك تعليقات:
إرسال تعليق