المحگور
ياك المحگور والمقهور
م عندو غي الصبر
يبني حايط من الصمت
بطوب لقهر
ويدور ف دواخل خيمتو
لموترة ب وتاد لقهر
عل كلام يهد
يضبر
يمحي بيه الغمة
المكتومة ف الصدر
باغي يدردك عل الحگرة
ويسرج عود لخيال
ويتبورد ف سربة
علامها محير
اتجلى ليه الگواد
من كثرة لوتاد
وحمار خيمتو شاخ
من التنهاد
حيطوه
كسرو ليه امقادف ل اعمر
وسط ابحر
يغرق
يشهق
يحرق
اوراق ايامو
يشير ب كمامو
هاز اعلامو
عل اللي يوصلو للبر
ضاع
تاه
توضر
ف وقت اللي اصبحو ليها اموالي
مقابلين غي لقصاير والليالي
امشات ليام
اللي كانت الناس لبعضها اعوين
واليوم كلها راكب عل عودو يشالي
يفعص
يوطى
يوطى عل بعضين
ويدوس اللي م عندو والي
محمد الوافي
ليست هناك تعليقات:
إرسال تعليق