مشاكل الأضحية
افهم يا فاهم واستوعب يا قاري
أش واقع للمسكين مع الأضحية وما جاري
ملي كتوصل سيمانة العيد
كل نهار خصام جديد
المشاكل بين لمرا والراجل في تصعيد
من الصبح إلى لعشية
*الزوجة*
كاع الناس شراو عياد
وأنت ماشي فهاذ لبلاد
واش ماعندك ولاد
تفرحهم شويا
ها جارنا الخضار
شرا حولي من لكبار
قرونو مايدخلهمش باب الدار
مراتو بنفسها تحكي ليا
بغيت كبش صردي
يلعب معاه ولدي
أما درع والبركي
مانشوفوش بعينيا
*الزوج*
حنا غي مساكين
و ف المعيشة مغبونين
من بعد ربي يرزقنا
غادي نذبحوها مثنيا
*الزوجة*
بلا صداع بلا فريع الراس
بغيت حولي نعمل منو الكديد والكرداس
ونعلقو يشوفوه الناس
لحمو قطار نسناس
غي عضة تكفي فيا
اسمعني أنت سير عند حمو
ونا نمشي عند مو
تسلفنا بنتهم طامو
كتشد الشهرية
نشريو حولي سمين ومزيان
وندخلوه قدام الجيران
راك عارف مرات فلان
خاصها غي على من تبان
ما نرضاش تقشب عليا
*الزوج*
ياك وليداتنا كيقراو
وفليساتنا في مصلاحتهم مشاو
وكتصرفي على الدار اللي بقاو
أشنو وفرنا باش نشريو الأضحية
إلى بغيتي نشريو حولي لأولاد
خاصنا نهزو ماعن الكوزينة بمافيهم البراد
ونزيدو عليهم تا لمخاد
ونبيعوهم فالجوطية
*الزوجة*
أجي علاش هاذ الحكومة المزعومة
ماتخصص ميزانية للطبقة المحرومة
واش باغيين يعيدو غير هما
وحنا ما يتفكرونا حتى الحملة الإنتخابية
*الزوج*
راهم خصصو 200 مليون لبرلمانيونا
وحنا الضعفاء بالشفوي قتلونا
ما نتكلم حتى يجي فيهم شي خونا
و يقول لي عفاك صوت عليا
راه خاص تا الأغنياء
يحسوا بالضعفاء
يدخلوا يديهم فجيابهم بكل سخاء
ويعاونوا خوتهم شويا
*الزوجة*
دابا اسمعني يا لحمق
شكون داها فيك راك غير تخربق
الحولي منو نخلق
اخرج جيبو ليا
بغيت نعض ونفرس
وعلى الراس نكسكس
وناكل مرقتو ونغمس
هكذا نديرو زردة مرضية
*الزوج*
قهرتني يا ساداتي
وبعت حويجاتي
واشريت حولي صردي
كما قالت ليا
يالاه دخلتو للدار
قالت لي رجع جيب الخضر
والزيت و أتاي والسكر
وما تنساش العطرية
تعالو تشوفو حالة البيت
لا ملح لا عطرية لا زيت
شحال الذل اخزيت
فهاذ العيشة الزغبية
على كل حال دعواتي ليكم
الله يسهل عليكم
باش كاملين تشريو أضاحيكم
ويفرح كل صبي وصبية
*نصيحتي*
سمعيني يا جارة واسمعني يا جار
الأضحية سنة نبوية ماشي افتخار
اشريو على قد الجيب و الإذخار
وسمي الله عند الذبح وقل يا رب تقبل ليا
*عيد مبارك سعيد*
علي الكرش في 26/08/2017
ليست هناك تعليقات:
إرسال تعليق