منجج لخيال ...............................................
شديت خيالي درتو منجج
غزلت حروفي ولات خيوط
نجيت حكاية بقيت نتفرج
قصة طويلة و سمعت عيوط
الوقت زربانة و الزمان عرج
غادي تابعها يجري ملهوط
بقا فيا لحال و صدري ثللج
شفت لمسكين بلغلا مخبوط
لكرا كاويه غادي و ينهج
شفت لمرضي شفت لمسخوط
بان ليا حكيم من اللغط تقج
الورقة عمرات و مدادو محطوط
عيا ما يهضر ما لقى ما يعالج
بنادم ولا يموت على الزفوط
حط وراقو رد لباب و خرج
مشا يتسارى و خاطرو مقبوط
وسط الواقع قال نفووج
لقى غير الظلم و كثرو الرهوط
رجع لدارو مسكين عيان مبنج ( mbennej )
لمجمر هبا ما لقى علاش يسوط
شد الركنة في جنب لمنجج
توضرات الكبة و تلفو لخيوط
بقلمي : عزالدين ناس الرمى خريبكة
Le 20/09/2018
ليست هناك تعليقات:
إرسال تعليق