...حلمة ملاوطة...
دخلت مور المغرب
لداري شوية نرتاح
توضيت وصليت
وطلبت الله يكون العمل مقبول....
....
ومع وليداتي تعشيت
للنعاس طحت فوق فراشي
مرخي ومدكدك مسبول....
.....
داتني غمضة
بيها حلى نعاسي
وبتمارة النهار كلي مشلول...
.....
جاتني حلمة
معاها سرحت ندور
وليت فيها تايه
وحاير مع بلادي السهول...
......
بانت ليا خضرة
وخيرها كثير ومنوع
والغلة فيها فاكية وسبول...
.....
بان لي شجرها مفنن
وربيعها منور
ووسط كل زنيكة
مخلطين خرفان وعجول...
......
بان لي مشروع كبير
والشركات حطوا لقوام
قلت ريح الاصلاح وصل
وشتاتو بينت لحلول...
.....
بطرقان بدات الاشغال
ومسارب تترقع
عروق بلادي ترواو
والما صالح للشرب
يجي سريع والروبيني محلول...
.....
بانت لي ملاعب القرب
ولدي مع صحابو يلعب
دايرين فرقة للكرة
معاهم مدرب وعليهم مسؤول....
.....
بان لي حداهم نوادي
فيهم شلا صنايع و حرافي
وتزادت مدارس ثانوي واعدادي
وحتى فرقة موسيقية خلاتني مذهول....
.....
ما بانت لي براكة
ما بان لي قزدير
ما شفت فبلادي نوالة
ساكنها فقير ومنا معزول....
.....
شفت العليكg ف شعبتنا
وسمعت ماها يهرهر
صافي ما مخلوض
ولشرابو مقبول.....
.....
ضربتني الفيقة
لقيت ذاتي ترجف
ما لقيت ما يعجب
ما عرفت آش للناس نقول...
....
لا ولدي لقى فين يخدم
لا مشروع للوجود ليه تنفذ
لا شي تبنى ولاشي تقيد
ما صبت انا باش نجمع الوقفة
صبحوا ظلوعي كلشي محلول....
....
........أحمد الناصري........
ليست هناك تعليقات:
إرسال تعليق