مجلة ‏رابطة ‏قمر ‏الأجناس ‏الأدبية ‏وبصمات ‏نقدية ‏

غير داوي
وشفت ف حلام حلامي
الرامي والعلام
وبنادم لهلالي
التيه
والسر ف لبحر
والعوام لمخنتر
لمجادل كتافو
نجوم  ف سماه  تلالي
ماضارب حسابو
ثاق وتغر
دروب الرملة
تفشل ركابي
عثرات  يعثر
تصيدو لمواج
والحسيفة سنارة لغدر
لمراية خيالو
الشبكة  ريح
خيوطها  عجاج
حفرة من لحفر
مشغول  بالو
يحصل
يوحل مع  الحل
حياتو تتبعثر
ولحروف
مدادها شعور
سمقها كحل
تكتب سطور
بمرود لكحل
على شيوخ لكلام
طالقة بخور
هواها هواوي
تهول وتحير
تجدب ع لقوافي
تعاشر لفحل
في غارها تكسل
تسكن  لخاطر
تجدب  سنين لعمر
لمحاين محايني
والحال
حالو سماوي
لحمام نفر
جفت المرجة هجر
كره القفز  ولوكر
شرب  لحنضل
وما رضى بالدل
ريق لحلاقم مر
والعاقل
يشد الارض ويفكر
يهز كفوفو
يخرج الكلمة
من جوف جوفو
لون لوجه 
البشرة   تعطي خبارو
صافي حليب
ما طمع ف طمع
ودارو حبيب
تغبر النقرة ف نحاسو
غير داوي
تهرس نابي
كويت وباري
القنعة ماشي ف الجيب
النخوة جدورها
مغروسين ف القليب
ماشي  ف الراس
الا تهرس الكاس
واش  يتجمعو شقوفو؟
الفايدة ف بنت الناس
الا شاب زمانها وعاب
تستر عيوبو
31/7/2018
بقلم محمد البراقي الحسناوي