( الزجل ) رقم 41
الفائز بالصف الثاني
الزجال : عبد الجليل خالدي
جاتني الأمانة تشكي فڭعانة
من حال زمان ملكو لغدر
من عشرة لاكحة للثيقة عطشانة
ب وجود المعقول لعقل كفر
ضاع ف النفوس لجام الرزانة
لا غربال يفرز و لا ميزان يعبر
سم لخدع عشش ف الڭانة
و طمع الدنيا عمى لبصر
الدواخل معلولة مسكونة بالآنا
الضانو خليل يطعنك ف الظهر
خصايل النفاق ف الضمير سلطانة
حب الذات على لڭلوب سيطر
ايام فايحة مكر ؤ خيانة
ف جرح الإخلاص الدسايس تعڭر
النية عوجة فعايل شيطانة
مفرشة لحصير فوڭ لجمر
تغوي الشوف بالصورة لمزيانة
حلاوة اللسان ؤ زين المظهر
ف لخدع تبدع ترسم فنانة
ف لخيال يا صاح بانية قصر
محبة الشوارب و الخاطر هربانة
مناجل لخديعة بالريط تزبر
ليست هناك تعليقات:
إرسال تعليق