★ الصاحب ★
يا من شاكي من لصحاب ★ و يتقلق بزربة
كيتسنى غي سبّة
خلّيك لبيق و واعي ★و افهم المقصود
الصحبة ماشي لعبة ★
او لا كيد و كذبة ★
الصحبة تتّبنى بصفا وصدق من غير حدود
★★★★★
لا تتمادى في العتاب ★ و تبادر بكتبة
تخلي جرح و ندبة
كن للخير سابق ساعي ★ و يديك ديما ممدود
لا تخلي دارك خربة ★
بنميمة و الغيبة ★
و تعود وحيد ف بيتك و بابك دارك مسدود
★★★★★
صاحب لبعاد و القراب ★و سقي لسانك محبة
انطق بكلمة عذبة
و لا تنفث سم لفاعي ★ و لا تجعلو سفّود
حَبّ و تحلّى بالطيبة ★
وقت ما جات الوجبة ★
جرّب و تقرّب للناس و تشوف المردود
★★★★★
اهل الحرف ليس غراب ★ كلهم ناس الجدبة
نَبْتُو في نفس التربة
حروفهم تراث قديم فن تركوه جدود
صحابي اهل و قربى ★
هنا و حتى فالغربة ★
هما دخري و راس المال و الكنز المرصود
★★★★★
نخبة من هلّ للباب ★ معزولة بالحبة
عنبة تعانق عنبة
كل اخ لخوه يراعي ★ الحبة كبرت عنقود
لمّتنا عقيق ف علبة ★
جمعنا خيط ف كبّة ★
و لّي ناداه الصاحب تراه ديما موجود
★★★★★
نجتامعو خاوة و حباب★ كالفرسان فسربة
رفاگة وسط الحلبة
برج عالي فوق قلاعي ★ و ما نخالف عهود
حلقة شيخ و طلبة ★
من نهلو يسقي شربة ★
ينبت في لنفوس جنان و طيب يشبه ورود
★★★★★
يزيد علوي اسماعيلي
ليست هناك تعليقات:
إرسال تعليق