💦 آشتا تاتا 💦
شحال من دولة هذا حالها
مستعمرة راسها
بسنانها و ضراصها
و ما جايبة اخبار
دايرة راسها من الكبار
معمرة أرضها غير بالغبار
ومدوخة كبار و صغار
بقصة جحا والمسمار
الخدمة بالرشوة و العبار
هد يضرب تمارى بالليل القمار
هدا ياكلها باردة بالنهار الگهار
هدا يبوس و يعطي الفلوس
باش يوصلو الخبار
حتى يتمكن من المدينة و الدوار
يدير حوانت و يبدا يرفع فالأسعار
يزرع الصهد باش تموت شلا أشجار
يدير فالطرقان كوارث و يسميها فالكود و الفار
يدير مشاريع باش يشري فيرما و يبني فيها الدار
على ظهر نخل و الزيتون و التفاح و العرعار
يغلي الماء و الضوء عل المسكين بدون إشعار
ويسكتو هادي هي الأسعار
يتسيف فصفة الخير و هو شر من ألأشرار
شحال من خو مستعمر خوه بلا استعمار
فقلب الدار
شحال من جار حاسد الجار
على والو
غير من حيت هو جار
حتى القصة ما بقاتش غريبة
الطيارة ولات بلا طيار
العالم وصلوا الخبار
و بدات نواقص تطنطن على راس العطار
لي ما صنع طيارة و باقي متشبت بالحمار
باقي تيتصرع و يتكوى باجمار
باقي معمر القهاوي وخاوي الدار
الوقت محسوب عليه و ما جايب اخبار
قلة ما يدار
يعجبوك فكلام الخيار
العلم نور و الجهل عار
و هما معمرين القهاوي بالليل و النهار
مدرسة من مدارس هدم ألأفكار
أجيو نبيعو القهاوي و نشريو المصانع
نغنيو عن السؤال شحال من هابط طالع
ما بين القهوة و الجامع
ما بقى عارف فين غادي واش واقع
ما تيسمع غير أش من فصيلة انت تابع
واش من الحراثة
ولا من اصحاب آشتا تاتا
ولا تعرف تلون و تكون تاتا
ولا غياط تتسمع طبل الحواتة
ولا قاري وفاهم الرجل من شماتة
سير حتى
ما تبقى حتى نبتة
ونزرعوك قوقة ولا لفتة
قصيدة من ديوان غيوانيات مجذوب
للشاعر الزجال محمد كتامي🇦🇱🌴💖🌺💦🌺💖🌴
17/08/2020
ليست هناك تعليقات:
إرسال تعليق