( المناشار) -------------------------الجزء الأول
صورة الوقت
فولاد الوقت
الكثير باغي يسكن التحت
مع البطاطا واللفت
ما يصبح ما يمسي
بغى يعيش فالضجيج
حسي مسي
للواجبات ناسي
تيحلم يولي ميسي
ولا شي كوميسير منسي
تيحلم حتي بشي كرسي
وعلاش ألا ما يحلم
وهو ناعس
وحتى إلا فاق
تيلقى غير النفاق
الطرقان منجورة
باش تضياق
السوق خاوي
عامر غير بالتقلاق
إما مشنوق ولا شناق
علم الأنفاق
كلشي مخبع التحت
زريعة اللفت
ما تبين غير الوراق
حارين بلا مداق
وما تدي منها غير العرق
وتطالب بالتقاعد وتقول حق
تدوز شغلها فقبتها
بحال البرق
المسكين تينين باغي غير شدق
شكون يسول وعليه يشفق
فبابو يدق
علاش أنت ديما مطرق
يضرب يد بيد تايصفق
واخا فوق الحبل معلق
تيشوف المدرسة
ولات قرطاسة
بشي سياسة
ضرب وجهك بيديك
ولا ما عجبك الحال قطعها
حتى تعيش معوق وما تلقى ما دير ليها
الكتاب سديتوه والرسوم شجعتوها
المهم ها جيل كامل طافي نورو
بدا يبني فسورو
بالتوت
والعنكبوت
لآ كبير ربى صغير على الخير
كبروه بأفلام الشر
والعنكبوت لي سكنات فالبيوت
أنت ياولدي منشارللشجر
إلى شفتي شي شجرة
منورة
يبسها بالزربة فمرة
ولا تخليها دير تمرة
قلعها من الجدر
أنت ربيناك وسميناك المنشار
نسينا راسنا وكبر المنشار
وبدا بنا من قلب الدار
و شلا اخبار
المهم
صنعوه على يدهوم
باش يزيد فهمهم
ياكل كلشي حيت منشار
قصيدة من ديوان غيوانيات مجذوب الجزء ألأول
للزجال محمد كتامي 🇦🇱🌴💖🌺💦🌺💖🌴
10/08/2020
ليست هناك تعليقات:
إرسال تعليق