العسل الصافي
هاد السنين ساح العسل من جبح
ودوق يا العربى ودوق يا الشلح
قول الحق و أسرتك شرح
شرح أمة النضال
من أيام دواية و الصنصال
كان المسرح
أيام محبة الحلا ل
و الإنسان لعمرو تيسرح
عارف ما يدوم غير الله و بيه مسلح
اليوم كلشي بيديك تحزن ولا تفرح
سعدات من قلبو و عقلو للحق تشرح
و سمع الكلام سيدنا لي تيفرح
ها أنت فبحور النور سبح
اعجن خبزك الصافي ومع الأمم طرح
تعلم تصفي الحلاوة من الملح
تشبت بترابك و السلام زرع و فلح
صفى ضبابك وأنت ترتاح وتريح
تمعن آش جاب شريب العسل لهاك تنفح
يا سبحان الله على شي بني مسرح
ما ﻴﮕر فيهم خير
ما يرحموا كبير ولا صغير
شحال منهم عايش بالحرام و يسنطح
عاجبوا الحال وهاد الحال ما يفرح
وا ثوبوا لله و قراو غير الم نشرح
يا ربى تعطينا ما نوينا فهاد الصبح
تشعل شمعتنا و الدار تشفى من كل جرح
.
قصيدة من ديواني // وطنيات مجدوب//🌴💦🌾🌹💖🌴
ليست هناك تعليقات:
إرسال تعليق