~~~~~~~~ زججججججججل ~~~~~~~~
زيد و زيد على بلعيد
زيد ساعة
و انقص ساعة
و حمير الگاعة
تدور طواعة
تدرس و تگول
ليك الطاعة
ما گدنا حلاس
زيد برداعة
زيد درهم
ورا درهم
عمنا ف الهم
بمياه الطم
گالو لينا
موتو بالسم
يا لمداويخ
سركم ردم
هز شواري
و فوگو شواري
و سير ك اعمى
و لا داري
ف طريق مظلام
كلو حفاري
حامل حلمك
حافي و عاري
شوف بنادم
مسكين عايم
ف بحر حلمو
موجو عادم
يجري وي طيح
ليلو جاثم
ما بان فجرو
باقي حاجم
يبكي سعدو
غادي ضدو
يندب حظو
يلطم خدو
غايص ف الهم
فيه ل وحدو
و لا شي حد
منو ينقدو
خربو عشو
ردوه نعشو
سلطو الذياب
فيه ينهشو
مصو دمو
نتفو ريشو
قتلوه هو
باش يعيشو
هز المشحاط
حط المشحاط
الناس عفنات
وسط الخلاط
هذا مسمار
ذاك السباط
لاصف و لا
يگلعو لقاط
ياكل يبلع
ولا يشبع
باصوات قطيع
بيه تبعبع
يگول ليهم
ليكم نسمع
سعا هو
ف عرگهم يجمع
هذا حالنا
وسط اوطانا
افساد و احقاد
ناخرة ذاتنا
ضميرنا ضاع
ف غاب اطماعنا
و لا نگولو
نصحو اخطاءنا
حسن العلوي
مراكش ( نونبر 2018 )
ليست هناك تعليقات:
إرسال تعليق