⬅️⬅️⬅️⬅️ زججججججججل ➡️➡️➡️➡️
~~~~~~~ كااااس الزماااان ~~~~~~~
مال حالك يا زماننا
غادي و علينا معفر
لا عيون منك شايفانا
واش انت ترى ولا مبصر
احبال الهم عاگلانا
و نغيزك ف الظهر يدبر
ما رينا فيك غي شقانا
ساقينا من كاس لفقر
طالق دناك سايگانا
يلا كنا بگر لاش لمكر
ف عزيب الذل سارحانا
و حصيد اعشابنا من حجر
ب نهار ناكلو عزانا
و ف الليل بريحنا نعبر
سنان رحاك طحنانا
دگيگ حايل ما يفطر
بلا مناجل حاصدانا
سبول خاوي باقي اخضر
ما شفنا غير ما ضنانا
سقيم ساقينا من الضر
لا حرف انت مقريانا
لعقول جيالنا ينور
تعليمك ضاع و جلانا
ما كان فصيح راه بغرر
ويلا مرضنا لايحانا
ف سبيطارات هي الضر
تحلب فينا من شقانا
وما ف دواها ما يبخر
بلكريديات شانقانا
و تگولي هذا مقدر
كفوف الميزان حارگانا
و اصبح طعامنا ينفر
بالما و الضو ضربانا
و شلا ما فيك فينا يجر
شبابك ضاع ما حمانا
اركب موتو وسط لبحر
بسمومك راح ما رضانا
و سمومك كل ما يخدر
لاش نارك كويانا
و موسك حافي راه يگزر
نياب ذياب فرسانا
و نازلة فينا تهنشر
ما هي فيك رحمانا
و لا بينا تگول تغفر
يمتى يصفا فيك مانا
و اغصان سعانا تخضر
تطلع الشمس حضنانا
ترجع طيورنا للوكر
ما نهاب فخاخ رصدانا
ما نخاف موكة و لا نسر
وللا نبقاو يا رحانا
مطحونين حب طول لعمر !!!!؟؟؟؟
حسن العلوي
مراااااااكش ( شتنبر 2018 )
ليست هناك تعليقات:
إرسال تعليق