🇦🇱زمان كورونا🇦🇱
آش بغيتوا يالقوم المعمية
خماسية ولا تساعية
تتقلبوا غير عالظلمة بحال لعشية
تتنصبوا على راسكم وتردوه ضحية
لعبة اكثر من جهنمية
شرقية أو غربية
العالم كله ماد يديه وينادي ها يدييا
ونتوما تتشوهونا و تتنقبونا
اكثر من الغراب و لحدية
لي تتنعتوهم كفار تيحنوا علينا
ونتوما بغيتو تحصدونا
كيف تيتحصد الزرع بالماكينة
ضربة وحدة تجمعوا وتطويو لينا
نسيتو يالخونا
الله واقف معانا
و ملكنا مشمر
تيطفي فيكم يا جمر
ومساعف معانا
فقلوبنا حدانا
الله يخليك لينا
بركة من الله وجدودنا
الحمد لله عندنا ملك
عارفكوم يا جدور الجلبانة
المغاربة عارفينكوم يا الحنحانة
ما فهمتوا حتى راسكم عاد تفهموا كورونا
هذا زمان كورونا
لي بانو فيه شلا خونة
خاصنا نحققو معاهم المگانة
ويعرفوا شكون حنا
يعرفوا الحق حق
الله الوطن الملك
يعرفوا
المغرب ماشي دجاجة ولا ديك
قادر يهلكهوم هليك
يابنادم الله يهديك
اتقى الله
وعلى وطانا هز يديك
قبل ما تعمى عنيك
و ما تعرف فين تحط رجليك
كلشي يدعي معاك بالخلا لى يخليك
ما بقى ما تگول لينا ولا نگولوا ليك
جمع راسك
الواد لى حفرتي البارح
اليوم ان شاء الله يديك
يا ملكنا يا المحبوب
بحكمتك نزلات الرحمة فالقلوب
الحمد لله ها لي يدعي ها لي يعطي من الجيوب
المغاربة بيك ومعاك واقفين حجر أو طوب
تايناديوك حيد عليبا هذ الحبوب
لي بغى يمرض الشمال والجنوب
بارك ما نفخوا الخونة ونفتحوا ليهم القلوب
باركا الموطنين عياوا
بسياسة الكذابة و الكذوب
سياسة معطوبة الكثير فيها مقلوب
الكثير فيهم عالمواطنين تيتقولب
حالف فكتاب الذيب والثعلب
كتاب المنافقين تريكة العقرب
لي من بكري معانا تتلعب
يطلقك الشرق يشدك الغرب
يا رمز الخير فبلادي
يا آمال أولادي و حفادي
جات الوقت والساعة هي هاذي
يا ملكنا الهمام
احبك في الله
أيها المنصور بالله
أقف أمامك وقفة حب و إحترام
يا ملك الحب والسلام
يا ملك الحكمة وألأقلام
فلك مني مليون سلام
بارك الله فيك أيها الهمام
فامضي بنا إلى ألأمام
لنتعلم كيف نكتشف الظلام
حتي نعيش الحقيقة لا الأوهام
فسلام على شريف وملك
إبن ملك
تربى على الخير والسلام
لا على الغدر والإنتقام
نعمة من الله القدوس السلام
يا ملكي يا إمام
خاصنا شعب علمي
باش نمشيوا مع العولمة
قبل منمشيو فالظلام و ما تنفعنا ندامة
خاصنا نفكروا فالمختبرات و العلماء
بانت ألإشارة وشفنا العلامة
لي ماعندو علم
باش غدي تنفعوا الفهامة
نطلب من الله للعالم السلامة
الله ينجينا وينجيكم من القمقامة
لي ما عارفين والو ومنوضين قيامة
بغاو يحاربوا كورونا بالعمامة
هذي جريمة
فحق الشعب المغربي و مظلمة
واش بالجهل غادي نزيدوا للقدام
واش بالشعودة غادي نهزوا العلام
كورونا ردوها حركا الكثير بغى يولي علام
يا بنادم تعلم و كون تتفهم
أرتاح فدارك
قبل ما تصبح نادم
العلماء تتبحت و تخمم
وانت من هذ الجايحة تتنكت و تتهكم
تبني و تهدم
ما هاز ليك ولا الرواح الناس هم
من حجم الجايحة تتقزم
بلاعلم بلا معرفة
وليتي عالم تتعلم
الله ينعل لي مايحشم
غير داوي
فالخاوي
شحال من هجهوج خاصو گناوي
شحال من قنفود
طالق شوكو آش ناوي
تيبخر البحر و البر بالجاوي
باغي يخرب لوطان وتيگول تندوي
هذا فات لمريض فاللعب
مسلم أو عاجبو الدنب
تعلب واش من تعلب
واش ما لقيتي باش تلعب
غير بارواح الناس
و لديورهم تخرب
شحال من مسعور
بغا ينقزعلى هاذ السور
باش يرد وطنه اللور
غير تينبح كثر من الكلب
علي الدرهم يحرق وطانو
ماشي غير الدرب
عاجبو اللعب
بسم لله الرحمان الرحيم
كل عجب و تيتعجب
لا قراية زينة
لا صنعة متقونة
حارق تبن و حب
وحتى للوالدين تيسب ( يتبع)
قصيدة من ديوان غيوانيات مجدوب للزجال محمد كتامي 27-03-2020
🇦🇱🌴🌺💖💦💖🌺🌴🇦🇱
ليست هناك تعليقات:
إرسال تعليق