***لَوْفا
لوفا كَلًة ؤ ل تْهرس أ صاحبي ساسْها
م تَتْرَقًع شْقَفيها ؤ م تَتْرمم
واخا تعيا م تزوق فيه ؤ تْماكي
ؤ بسبع وجوه تخطط ؤ تْصَمم
لوفا شريان بالحس ؤ طْهُر مَلْيان
ف حْظي راسك ي فلان...
تفرط فيه ؤ يتقطعوا حبال لَمان
يريبو سْواريه والحال يَتْجَهم
لوفا وصية أساسو محبة ؤ نية
م يطيق حية ولا حرابي ولا حدية
ركيزتو قوية ب لخير م تَتهدم
جنانو مزهر ب لمان ؤ لحنان
عروش الصفا فيه ظليلة سلوان
ِؤ عناقيد لمروة دانية رزانة ؤ حِكم
ؤ ذيك الكُدية ل في القلب العالية
نوًارْها مْفتح ؤ أغصانها ب صْفا مايلة
م تحزن بين نْغامها م تشكي م تْخَمِم
لوفا م يَمْكُر بيه غير الغدار
واخا يكون وَجْهُو نُقرة بَلاًر
غدا يتْكشًفْ كذوبو ؤ يْبان مطيار
تتزاد لحريقة ف جُوفو لَمْظَلم
لوفا م هو نزوة ؤ ل ب حْلاوَتْ لْسان
بل نضج ؤ عهد ونْقا و أمان
مقياس الرجولة...
ؤ طريق لغْدَر حُفْرة عميقة ؤ نَدَم
لوفا كًلًة ؤ لتهرس أ صاحبي ساسها
م تترقع شْقَفيها ؤ م تترمم
ف صون كلامك والعهد لا تبيعو
سوق الصفا اليوم ذابل رْبيعُو
ؤ سوق نْفاق ؤ زْواق عامر مْزَحِم
لوفا...
***المغرب***الشاعر والزجال : أحمد الكندودي***
ليست هناك تعليقات:
إرسال تعليق